BAHUVISHAYAK SHIKSHA : CHUNAUTIYAN EVAM SAMADHAN

bahu vishayak shiksha ek vyaapak drshtikon hai jo chhaatron ko vibhinn vishayon evan kaushalon ko samanvit karake ek samagr shiksha pradaan karatee hai jisase chhaatr keval ek vishay tak seemit na rahakar ve vibhinn drshtikonon se soch saken, kisee samasya ka samaadhaan prastut kar sake tatha apanee srjanaatmak kshamata ka vikaas kar sake. bahu vishayak shiksha koee naveen vichaar nahin hai isake darshan praacheen shiksha pranaalee mein bhee hote hain jahaan ved puraan khagol shaastr aayurved ke saath saath anek kaushalon ka gyaan karaaya jaata tha kintu vartamaan vaishveekaran ke yug mein jahaan duniya tejee se badal rahee hai srjanaatmakata, navaachaar ka mahatv din pratidin badhata ja raha hai. aise mein yah shiksha bhavishy mein aane vaalee chunautiyon ka samaadhaan karane mein madadagaar saabit ho rahee hai. vartamaan samay mein is shiksha kee aavashyakata is baat se hai ki aaj aise vyaktiyon kee maang hai jo kisee ek kshetr ke visheshagy na hokar vibhinn kshetron ka gyaan rakhate ho kyonki kisee bhee samasya ka samaadhaan ek tareeke se sambhav nahin hai us samasya ko vibhinn vishayon evan drshtikon ke samanvay se hal kiya ja sakata hai. yah pranaalee nit naveen samasyaon ke samaadhaan hetu naveen dhang se sochane, naee sambhaavanaon ka pata lagaane ke lie chhaatron mein navaachaaron evan srjanaatmak shakti ka vikaas karane kee kshamata pradaan karatee hai. bahu vishayak shiksha chhaatron ke lie rojagaar ke avasar pradaan karatee hai.isakee mahatta ko dekhate hue naee raashtreey shiksha neeti 2020 mein bahuvishayak shiksha par bahut jor diya gaya hai. is shiksha neeti mein chhaatron ko apane vishay ke chunaav kee pooree svatantrata hai saath hee vibhinn vishayon ke beech kee jo dooree hai use kam karane ka prayaas kiya gaya hai jisase chhaatron mein kariyar vikalp chunane mein aasaanee ho sake unamen srjanaatmak evan navaachaar kee kshamata ka vikaas ho sake,chhaatr apanee badalatee paristhitiyon ke anuroop apane aap ko dhaal sake tatha apane samaksh aane vaalee samasyaon ko apanee samajh evan shakti se hal kar sake. parantu is shiksha ko poorn roop se prabhaavee banaane mein anek samasyaon ka saamana karana pad sakata hai lekin sahee neetiyon tatha sarakaaree evan vyaktigat prayaason se in chunautiyon ko door kiya ja sakata hai.